Kanunyň öňünde deňlik
"Equal means equal." Kamala Lopez
Kanunyň öňünde deňlik
deňligi aňladýar diňe!
Egilmegi aňlatmaýar,
epilmegi aňlatmýar,
däl ol asla çökmek dyza
wezipeliň öňünde,
ýylgyrmak däl günäli,
tutulan dek ogurlykda,
ýa-da işläp, aýlygyňy
para berip almak däl ol,
ogurlyga çokunmak däl,
sürýär diýip ogrular täk,
ýykylmak däl depilmäkäň,
ýa diýmek däl depjeklere:
"Wah, Siziiňki dogru-la!"
Kanunyň öňünde deňlik
deňlik ýaly gün öňünde,
hiç gün görmän gagşamak däl,
ýa ölmek däl gowrulyp.
Kanunyň öňünde deňlik
deňligi aňladýar diňe,
ýeňilmegi aňlatmýar,
söweşe çykmazdan burun,
dymmak däl ol mamla wagtyň,
öldürmek däl özüň urup.