Ýaş tokaýa barsaň

Ýaş tokaýa barsaň, ownuk agaçlar
bir-birinden dyzmaç uzadar elin;
howasy sergin däl, dymykdyr, çygdyr,
uzak galýan ýokdur niýetläp gelip.

Gojaman tokaýy gören adamlar,
asylly hem salyhatly baglaryň
saýasynda biraz duran adamlar,
öz-özünden dörän ýaly ýol-ýodaň
gyrasynda çatma guran adamlar,
ýol-ýodasyz ýaş tokaýda aljyrar,
hemem özi bilmän gelen ýerine,
nädip çyksam diýip, yzyna garar...