Ýowşan Annagurban

Geň arzuw

Tanşym diýdi soňky döwür
manekene gözüm gidýär.
Men ilki düşünmedim,
soň dikanlap soradym,
modellere diýjek bolýaňmy diýdim.
Ýok, ýok, modellere däl,
sebäp model bolsaň, geýip-çykaryp,
her eşikde eýläk-beýläk gezmeli,
a maneken şol bir aýnaň öňünde
durmaly hem bir etmeli işi bar,
egnindäki eşiklerin güjeňläp,
geçenleriň ýürek-bagryn ezmeli,
sowmaly, salmaly dükana süýräp,
ýok, çykyp däl, gymyldatman barmagy,
maneken bolmasa, kim başarardy
daş görnüşe gul etmegi adamy,
hemem muňa gep-gürrüňsiz yrmagy?