Gapy duzagy

Eger gapy açylmasa kakaňda,
obam diýip gelseň uzak ýol geçip,
bir gezek däl, iki gezek, on gezek,
gygyraňda ylgap çykmasa kimse,
o gapy seň gapyň däldir, pikir et,
ýa-da açyp derwezäni demirden,
barsaň, görseň, bilmeseler kimdigiň,
ýa-da bilip, bilmezlige salsalar,
sylag, hormat etmeseler ýeterlik,
gözli bolsaň, kör ýerine alsalar,
o şäher seň şäheriň däl, pikir et,
ýok, ýene-de synanyşsaň, gygyrman,
gaýtalasaň hakykatyň ýuwaşja,
özüň bilen gürleşýän dek, kes sesiň,
git diýseler urman, sögmän, öldürmän,
olar seniň tiredeşiň däl artyk,
dindeşiň däl, bolmanyna şükür et.