Kapasa duzagy

Sen halkyňy tanamazdyň,
tanamazdyň özüňi-de,
tanamazdyň dost-ýaryňy,
doganlaryň tanamazdyň,
gelmän muňa ýaş başyňdan,
gany birim diýip ile,
jany birim diýip ile,
diýip ile dini birim,
ýa-da diýip, dili birim,
gelse dogan diýip biri,
ýa gardaşym, dili bal dek,
ýüzi gülýän, içi üýrüp,
o tarapdan, bu tarapdan,
aralaryn serhet kesen,
tanamazdyň adamzady,
dar kapasa açyp gözüň,
aç diýýän dek giň dünýäni,
ýaradan hak berdi sözüň!

Kerdiň, belki, gulaklaryň
açdy taňry eşitmejek
owazyňa, içden gelýän,
diňlemejek diýse ölýän...

Tanamazdyň kärdeşleriň,
galam alyp ellerini,
dillerini ýüpsüz daňan,
belki, gorkup iki ýüzli,
ýa gorkmaly zady bilmän,
bilmän nirde çöküp dyza
galanyny il-ulusyň,
ýa-da bilip, geçip göwni,
galmaz diýip basyp alnan
uruşlarda, başlan haçan,
gutarmajak bu asyrda,
indikide, galsa adam,
ýeňlen mydam özün ýeňmän,
bilmezdiň sen duşmanyň kim,
daşda, içde, öwrenmeli
göçümlerin sanap günde,
diňlemeli kimi, haçan,
düşünmeli nädip, gaçan
gaçýarmy ýa kowalaýar,
okamaly haýsy dilde,
öz diliňde tapmasaň zat,
belki, güýçsüz, ýa ynanyp,
gelmejege ederdiň dat...