Ogurlanan arzuw

Azatlygy, erkinligin adamyň
paýlaşmaly, bölüşmeli, talaman,
ýarag alyp, tanka, topa daýanyp,
öldürmeli, gyrmaly däl adamy,
bölüşmeli ýeri, ýurdy, zor bilen
iýmeli däl hiç mahlugyň paýyny,
ýollar ýaly, howa ýaly, gündelik
jana şypa akar suwlar mysaly,
deňlik gerek, kanunlar bar ýazylan,
ýazylmadyk kadalar bar, baý bolup,
ýa beg bolup basgylanlar ejizi,
tiresi ýok, taýpasy ýok, agzybir,
bir bitewi, bilýär olar etjegin,
ogurlaýar il-ulusy özünden,
bilýär olar bizi eltjek ýerlerin,
a biz gelip, görüp ýoluň soňuny,
ýok ýerinden garaşýarys gudrata,
Alla bardyr, hudaý gorar diýýäris,
bu bir arzuw, o birleri, bu biri
birleşdirýär talajagy, ezjegi,
ne azatlyk galýar, ne-de erkinlik,
men günäkär, sen günäkär, jan jigi!..