Iň hatarly adam

Iň hatarly, syrly örän,
ýa gorkulýan adam bolup,
atylmajak bolsaň türmä,
ýa bolmajak bolsaň gülki,
gowy bolsun diýme ýurdum,
diýme aç-hor galmasyn il,
kömek etjek bolma oňa,
kanun bolsun, kada bolsun,
hormatlansyn uly, kiçi,
aýal dogan, erkek dogan,
hakykatda, ýalandan däl,
iş ýüzünde sylansyn däp,
dessurlary obalaryň
diýjek bolma dogry sözi,
garşysynda ogry hanyň,
dişiňi gys, ýylgyr süýji,
ýürekdäki galsyn içde,
diýýänin diý mähelläniň,
ilde ili ýok edýäniň
biri bolsaň, howply dälsiň,
ilde ili döredýäniň
biri bolsaň, howply borsuň,
ýalan ýaşap ýykylsaň-da,
gynanmarsyň beýle uzak,
pikir etme, ýanmaz janyň,
gije ýala, gum sep gündiz,
biter ýaraň, durar ganyň.