Il sesi

Susdurylan iliň sesi,
aýdylmadyk sözi bolmak,
gözi bolmak, ýumulmadyk,
uklan bolup, ýatyp bilmän,
dik oturan uzak gije,
ýok edililýän iliň ogly,
gyzy bolmak oýun däldir,
diri bolmak oýun däldir,
aglanda il, sessiz galyp,
gülki däldir bu iş asla,
ýöne güler gülküsizler,
bilmeýänler gülki näme,
agy näme, dünýä gelip,
sen olary diňle käte,
gabat gelse, ýörite däl,
ýatdan çykan ýüz-gözlerin
synla biraz, sowuklygy
gagşatsa-da süýekleriň,
minnetdar bol olara sen,
gorkuzany üçin gaty,
ürküzeni üçin gaty,
ähli zady, okadylan,
sorag bermän alyp gaýdan
mekdebiňden, gaçar ýaly,
gowy boldy öwreneniň,
oýlanmagy azda-kände,
gaýtmaz ýaly yza gaýdyp,
ýapyk ýoly açmak üçin,
ilki özüň açar ýaly...