Tomaşaçy tomaşasy

Tomaşaça ýeter gaty oturgyç,
ýa öýünde ýumşak diwan, başarsa,
haly, keçe, kilim ýeter beýlekä,
ýa daşarda kerpiç tapar, oturar,
tomaşaçy bolsaň, tomaşa ýetik,
seretmeli, ýylgyrmaly, gülmeli,
ýa gynanyp, aglamaly kämahal,
durmuş diňe toý, meýlis däl, uruşlar
zerurlygy bolup galdy adamyň,
birine ýer, birine mal gerekli,
beýlekiler ýarag satar, pul ýasar,
o bir ýurtda, bu bir ýurtda gul ýasar,
düýnki goňşy, düýnki dogan, gardaşyn
gapyl basyp, ýa goranyp öldürer,
o bir esger gaýdyp gelse sag-aman,
ýa ýaraly, olja alyp, aýaly,
çagalary begenerler, aglaman
ýurt halyna, ölenleriň yzynda
galanlaryň agysyny eşitmän,
tomaşaça özi tomaşa, belki,
tutan guşy birçak iýilen ütmän.