Tobasyz ýazyjy

Galpy öwýän bilse-de,
tanasa-da bir kemsiz,
ölen, ýiten, çala jan,
kimdir birin magtaýan,
ile belli, gamyş dek,
akar ýapda gagşaýan,
ýa gyşaran höwesek,
haýsy ýandan ýel össe,
keýpi-sapa niýeti,
iman bolup partiýa,
din bolanda ýalan söz,
ýeke şarpyk iýmedik,
il batýarka ýüzde-ýüz,
ýetmiş, segsen ýaşasyn,
bir aýagy gabyrda,
ýumar, açmaz gözüni,
seretmäge özüne,
ýa soramaz, garaşma,
diýip nädip ýaşadym,
ýa ölýärin niçik men,
galpy öwýän, tobasyz,
diýmez, Alla, kiçik men.