Galat bizi goraýarmy?

Gahar bizi goraýarmy,
duruzýarmy ganyny ol,
açylanda ýaramyzyň,
gutulmaýan uzak ýyllar,
çuň ornaşyp içimizde,
basylan biz, asylan biz,
ýüpsüz, darsyz, sadalykdan,
galaklykdan yza, çünki,
gorar öýtdük duýgy bizi,
islegimiz adalata,
gorar öýtdük ynam bizi,
hakykata, ýyrtyk ýüzi,
gögerdilen gözi, gaşy,
sapak alman ölenlerden,
dözmän biziň halymyza,
kömek üçin gelenlerden.

Zäher bizi goraýarmy,
pürksek başga, hezil edip,
ýa öldürýär özümiz ol,
köpeldikçe içe gidip?..

Gürläp bilsek dymyp uzak,
ýumruk düwüp, ara daşka,
arlap bilsek, güýçlümi biz,
ýa bolýarys biraz başga?

Berekella diýse biri,
arkaňda biz, öňe, öňe!
Süýşerismi öňe biraz,
ýa bu bir boş hyýal diňe?

Ýigrenç bizi goraýarmy,
goraýarmy gazabymyz,
gorkuzýarmy duşmany ol,
ýa görkezýär gorkýanymyz,
gowşakdygyn erkimiziň,
gargyş bizi beýgeldýärmi,
ýa gaçyrýar görkümizi?

Ýöne belli, gaharyň az,
gaýratyň az, sylamazlar,
her öňýeten çeýnejek bor,
toslap ýa-da aýyp gözläp,
agyrdarlar beter, belki,
agyrtmasaň agyr sözläp...

"Iň esasy – gijä galma,
urulmankaň ur öňürti,
ýa öňürdüp zyň hapany,
ysy galsyn iň bolmanda"
diýýänleriň artýar sany.

"Ýa kazy bol, iň aňsady,
garalawçyň gara ady
gorar ony, ýakynyny..."
Galat bizi goraýarmy,
ýa biz nirden tapjak çyny?

Ret eder seni iliň,
ret etmän, sebäbi ol
ret eder özün ozal,
ýa-da eli ýetmän ýaşar,
bilmän ýaşar durmuş näme,
ýaryş gurup, utuşy ýok,
ýesir bolup pula, mala,
at-şöhrada, özün aldap,
bilmän bu ýol giňmi, darmy,
şöhrat bizi goraýarmy?