33 ýyllyk ders

Bilim beriň oglanlara, gyzlara,
beriň biraz akyl bilen düşünje,
bolmasynlar beýle sada,
o ýeriňde, bu ýeriňde
gizläp neşe getirtmeýär hökümet,
özi satýar ony uludan onuň,
bilim beriň oglanlara, gyzlara,
çagaňyza beriň biraz gözýetim,
beýle aňsat, ýeňil olja bolmasyn,
tutulmasyn o ýerinde, bu ýerde
neşe bukup, bilinmejek mysaly,
işletmegi, ulanmagy öwrediň,
kelle diňe baş atmaga gerek däl,
goragly ýer, barlagly ýer, arzyly,
her öňýeten neşe geçirýän bolsa,
ýa geçirýän bolsa başga harydy,
ylalaşman, paýyn bermän başlygyň,
bir sebäbi bolarmydy açlygyň?

Bilim beriň oglanlara, gyzlara,
ýaşlygyndan, çagalykdan, belki-de,
ertekijik okap beriň azajyk,
soň beýleki kitaplary görsünler,
ele alyp, sahypasyn waraklap,
oýun, kino, näme gürrüň edilýär,
düşünsinler, hiç birisi oýun däl,
dünýä bazar, ömür alnyp, satylýar,
aňsat iş däl serhet aşyp, aýlanyp,
neşe alyp gelmek yzyňa ertir,
aňsat iş däl aňsat etmek durmuşy,
gerek ýerde işlemeseň, durmasaň,
paýlaşmasaň, bölüşmeseň hakyňa,
heşdegiňe kaýyl bolup urmasaň,
öldürmeseň, ýa-da maýyp etmeseň,
ur diýleni, hökümeti ynjytsa,
aýtjak bolsa neşe satýanyn onuň,
bilim beriň çagalara azajyk,
herrelmesin tutan bolup her ogry,
her talaňçy gelip akyl satmasyn,
wezipesin satyn alan, egriler
depmesinler ogluňyzyň ýüzüne,
gyzyňyzy kemsitmesin öňýeten,
aýakgabyn süpürýänler kanuna,
besdir, sapak berenleri çaý, suwsyz,
besdir daňanlary kepege, una.