Düşnüksiz aýralyk

Ýaş gitdikçe, uzak ýolda ýorulyp,
ýitirýärsiň adamlary bir-birden,
çünki çatryk aýra salýar dostlary,
biri sagy, biri soly saýlaýar,
diňe dost däl, tanyş-biliş, duşmanlar
uçýar gözden, görünmeýär öňki dek,
toýlar, ýaslar başga bolýar öňküden,
başga bolýar ozal bir bolan durmuş,
olar seniň iş-güýjüňe dahylsyz,
sen olaryň durmuşyna ýat örän,
käbirleri gerekleýär ýitirip,
aralykda başga alajy bolman,
seni däl-de, belki, küýsäp başga zat,
sebäbi kän aýralygyň, bilýärsiň,
ýat, keseki bolup galan adamlar,
diňe başga ýurda gitmän hoşlap,
bir obada, bir şäherde, köçede
ýaşasa-da bir-birinden daşlaşyp,
islän däldir ýat bolmagy bu hili,
düşünmek kyn, düşündirmek mümkin däl,
kim özünden aýryp, ýat edýär ili?