Çig ýaşaýyş

Arada birisi käýindi gyzyp,
seniň ata-babalaryň asyrlap,
açlyga, horluga döz gelip, ozup,
yza galman hiç tireden, taýpadan,
üstesine ýat däl, hut özi bolup,
aty bilen, goýun-geçisi bilen,
müň keseliň emin tapyp, gutulyp,
uruş-gowga çydap, göçüp wagtynda,
ýa syýasat, din-imanyn täzeläp,
durşy bilen bolup trawma, hasrat,
aýdym-sazda için döküp, käkeläp,
aman galan däldir doguryp seni,
bu gün biri internetde eý diýdi,
beýle diýdi diýip köçede agşam,
jibir-jibir edip zeýrenmek üçin,
düşün, eger gyzýan bolsaň kemsitmä,
ownuk-uşak, gülüp gitmeli diňe,
gahar etseň gürrüňine her gojaň,
ýa oglanyň, bilmän dyzaýan öňe,
akyl-huşuň ýerinde däl o diýen,
ýa bileňok öz agramyň, derejäň,
ýokarrakdan seretmegiň ýerine,
baryp hapasyna basýarsyň köçäň...

Ýok, beýle däl diýdi beýleki biri,
sen dökülseň, ýa-da çogsaň süýt ýaly,
gyzgyn plitada goýlan gyssanmaç,
çagalara bermek üçin ir säher,
internet däl, ata-baba trawma,
damarda, geniňde saklanan zäher,
käte seni çykarýar-da çägiňden,
öz aýagyň aşagyna taşlaýar,
seret, synla, tana diýýän mysaly,
bu bolmaly, gutulgusyz zat, belki,
adam diňe gelşi ýaly ýaşaýar,
ýaşamaýar bilip, düşünip ilki.