Oýunsyzyň oýny

Çeni ýagşy ýöntemligiň,
telperligiň çeni ýagşy,
men-menligiň, gedemligiň,
bahyllygyň çeni ýagşy,
çeni ýagşy körlügiň-de,
ýa ýigrenjiň, gapýan gözi,
sen bir sözlem, dogry sözi
ýazyp bilmän öz diliňde,
okap, diplom alan adam,
wezipede galan adam,
bilmän eýe, habar näme,
ýa bilýäni bilmän, gardaş,
gel, kömek et diýip bilmän,
oda itip gara gözli,
garyp halkyň çagasyny,
beg oýnuny, baý oýnuny,
bardym oýnun, aldym oýnun
oýnan bolup, kime gülýäň,
ýa azmydy öň edeniň,
ýa gülkimi saňa ölýän?..