Çaga bolmasaň

Çaga dälsiň, garry dälsiň,
näsag dälsiň, eger bolsaň,
ýatyp galsaň, başga gürrüň,
turmalysyň, durmalysyň
öz aýagyň üstünde sen,
atmalysyň öz hapaňy,
dökän-saçan edip gitmän,
içiň gara, ýüzüň çyrşak,
bu-da geçer diýip ýatman,
barmalysyň nähäk töhmet
atylanda başgalara,
talananda garyp iliň,
ýa itilse gara gorpa,
bilmez, görmez oýnun goýup,
durmalysyň ‘bolmaz’ diýip,
ýok, barmasaň, görümeseň,
soň, uzakdan akyl satma,
ýa-da satsaň, geçer diýip
umyt etme gymmat, gowy,
hiç söweşmän ýa-da goldap,
gaýtaran ýok gelen ýowy.