Aýralyk

Aýralyk kyn, agyr örän, elbetde,
ýöne gowy türmesinden türkmeniň,
diýseler-de gedaý bolanyň gowy,
öz iliňde, ýat illerde şa bolman,
öz ilinde şa bolanlar tussag dek,
gypjyn-gypjyn, haçan näme boljagyn
bilip bilmän otyr, edip etjegin,
kineli il, arly millet, öç aljak
emeldarlar näme eder birigün,
ýa biljek ýok Allaň soňky kararyn,
seret dünýä, Ýer diýilýän jennete,
imperiýa gurup, dowzah oýnuny
oýnanlaryň, bir, iki däl, yzynda
galan diňe harabalar, açylan
mazarlardan käte tapylýar altyn,
kümüş, ýöne, belli, kömek etmändir,
aýralyk kyn, agyr örän, elbetde,
ýöne gelip, kim galypdyr, gitmändir...