Içdäki yhlas

Içiňde iliňe, doglan ýurduňa
söýgüňi saklamak, ýitirmezlik kän,
öldürmezlik ony öldüren bilen
goşulyşyp, öz tarapyň terk edip,
pikir etseň, barha kynlaşýan ýaly,
dogan-garyndaşyň, toýda, ýasynda
görülmedik goňşularyň daşlaşýar,
çykýar gidýär ýüz keşpleri ýadyňdan
duz iýişen dost-ýarlaryň, tanyşlar,
käte bir dumanda, salgym mysaly,
ýa düýşüňde, geçen wagtyň serhetden,
görüp gaýtmak üçin çetini obaň,
çala görnüp, senden gaçýarlar daşa,
içiňde iliňe, belki, adama,
sylagyň saklamak kyn düşýär ýaşap...