Geň galma
Palestin şahyry Mosab Abu Tohanyň äheňinde
Sen geň galma, haýran galma hiç haçan,
ýykylan jaýlaryň harabasynda,
gömlen ojaklaryň gatan külüni,
daş, kesegi, demir-betony görmän,
ýa barmysyň diýmän zuluma asla,
owal-ahyr görülmedik bägüller,
güller egnin galdyranda ýaz gelip,
güneş bilen, ýagyş bilen gürleşip,
göýä, uruş, gowga bolmadyk ýaly,
ejesini gören bäbek mysaly,
açylan güllere geňirgenme sen,
top sesiniň arasynda, gypjynyp,
belki, şeýdip aýtjak bolýar tebigat
ölmejegin, aman galjagyn çynyň.