Göz meselesi
Biri-birisinden göçürip ýazýan,
ýa göçürmän ýazýan, ýöne uzak däl,
şeýle bir kän, okap-okap soňuna
çykmajagyň belli ýeke ömürde,
ýöne bir gün uzak gidip, azaşyp,
dolanýarsyň ýüregiňe, özüňe,
düşünýärsiň ozal görüp bilmedik,
golaý-goltumyna baryp bilmedik,
beýik diýen dagyň beýik däl beýle,
geregi ýok azap edip, ýol aşyp,
gitjek bolmak çöle, deňizde seýle,
iller gidýär diýip, çapylyp, urlup,
suratyny görmek ýeter, belki-de,
hemme ýeri, dag-deresi çalymdaş,
adamlary meňzeş biri-birine,
birazajyk tapawudy bar ýöne,
ýadaw baksaň, bary görüner ýadaw,
täze gözde täze, könede – köne.