Goralmadyk maşgala

Maşgala diýýärler biri-birine
elin berer, arka çykar, ýylgyrar,
ýykylanyn ylgap baryp galdyrar,
el-aýagy sypjyrylsa, döwülse,
emin tapar, seýik gözlär, begenmez,
seretmez çekilip gyra keseden,
ganyň sarkyp ýatsaň ýoluň ugrunda,
ýa keseki, ýatlar, ganhor hökümet
töhmet atsa, tutsa, atsa zyndana,
garaşmaz öýünde näderkäň diýip,
çagalaryň zarmy çaý-suwa, nana,
soramagy bilip hatarly, belki,
çykyp gelseň bir gün ýüzüňi sallap,
indi adam bolmaz, agypdyr eňki,
içer, çeker diýip garaşsa dogan,
doganoglan, çykan maşgala däldir,
başyň dikkä başga bolar kä ýakyn,
dogan bolsaň, dogan diýýärler ilki,
a soň belli bolýar kimiň-kimdigi,
bu maşgalaň bahyllykdan basylyp,
öz-özüni depip, gapyp, ýeňdigi.