Köşk oýny

Ýüzükli han, ýetim, samsyk diýilýän,
açylmanka açgözlügi entek kän,
adamlary çagyrardy, gülerdi,
ýylgyrardy ak gürekden, mysapyr,
ugrun tapyp gürleşerdi, sorardy,
näme gerek, at-dereje, maşyn, jaý,
diýerdi ol düşünýärin, siz ýaly,
menem tämiz, düzüw ýurdy isleýän,
kanun bolsun, düzgün bolsun watanda,
şeýdip onuň daşy doldy kem-kemden,
hem özüni, hem il-günün satandan,
ýöne pahyr ynjalmady, bir-birden
gapyl basyp, dyndy doýup ýatandan,
wezipesin ýassyk edip, ynanyp,
ok iýýänçä hiç tüpeňsiz atandan,
indi başga döwür, gürrüň gutardy,
ynanýan ýok bir-biriniň sözüne,
hala içi, hala daşy watanyň,
bakmaz boldy bir-biriniň gözüne.