Ownuk derdi

Gep gözleýän gep içinden,
nep gözleýän çöp içinden,
köne tanyş, içigara,
gutulmajak öz göçünden,
ýatyrsa-da oýnun mydam,
göçümlerin dowam eder,
goýmaz gorky-howatyry,
içi heder, daşy heder...

Sen jaň etme, araňy aç,
alma jaňyn jaň etse-de,
jogap berme hatlaryna,
bagla ýolun, öçür adyn,
okama hiç ýazan zadyn,
ýa diňleme aýdanlaryn,
näme gürrüň etse-etsin,
petik bas-da taşla, açma,
jaň etdirse birlerine,
gepe çatjak, çöpe atjak,
pikiriňi biljek bolup,
satjak bolup gymmat, ujyz,
golaýyňa getirme hiç,
pikir etme, ýüzi galyň,
habar tutat ir ýa-da giç.

Dosty bolmaz, ýary bolmaz,
mertbesi, ary bolmaz,
göýä hiç zat bolmadyk dek,
gapyl basar, salamyny
alman bolmaz, adam bolsaň,
ýöne şol bir boluşydyr,
osmakladyp ony sorar,
muny sorar, hehe-hehe,
ownuk ownuk bolar mydam,
ses ýazýandan çekil çete.