Ýalan talaby

Köpçülige ýalan gerek palawly,
dogramaly, gara burc sepilen,
aýdyp berseň iň isleýän zadyny,
mysal üçin, öldi diýip o biri,
ogry-jümriň nobatdaky başlygy,
hezil eder, iki günlük aldansa,
özi ondan gowy boljak mysaly,
çyn gerek däl adamlara, ýoldaky
daşlar hakda, kesek hakda gür berme,
gürrüň berme köpri hakda ýykylan,
ogurlanan agaçlary, sütüni,
ýa sementi kemlik eden wagtynda,
ol eziji ýokka heniz aýatda,
gürrüň berme ile gyzgan hakynda,
iň esasy gyzgan bolan özleri,
özlerine garşy bilip ýa bilmän,
oglun, gyzyn para berip okadyp,
ogurlyga itip, itip ýalana,
utulan günleri gänäkär gözlän,
duşman gözlän doganyndan, dostundan,
ýa-da beter bolan, başyna çykan
ölse, ýitse üýtgejek dek watany
ýurdy alan, özlerine ýetirmän,
bir günäkär, tutuş ýurdy satany,
garalasa bary agarjak ýaly,
köpçülige palaw gerek jüýjeli,
a ýalança serpaý, iň uly haly.