Bilmek islegi
Deýwid Waýtyň äheňinde
Meniň gara gaýgyma däl,
bir özümi Allaň onda,
ýa başga-da hudaý barmy
ygyp ýören golaýynda,
meniň gara gaýgym diňe
bilmek sizem ýeke, ýalňyz,
ýa taşlanan ýalymy kä,
hiç gapysyz daş galada,
bilýäňizmi görüp, aňlap,
bu ýagdaýy başgalarda?
Meniň bilmek isleýänim,
taýýarmy siz bu dünýäde,
ýaşamaga her zat etjek,
hemem sizi bozjak hökman,
ýa diýmäge taýýarmy siz
bakyp yza, göz, gaş kakman,
ynha, duran ýerim meniň,
durjak ýene diýip gorkman.
Meniň bilmek isleýänim,
siz nähili erärsiňiz
bu durmuşyň howurynda,
salgym bolup öňe garşy,
gowurdak dek gowuranda,
gara gaýgym bilmek siziň
telwasyňyz gara günde,
çäksiz göge serip eli,
kaýyllygyň sürgüninde,
islegiňiz ýaşan bolmak,
ýat illerde dodak çöwrüp,
görüp durup soňyn gaýym,
men eşitdim, bizi synlap,
hak diýýärmiş: “Güýç ber, Alla,
ýeke goýma ýa, hudaýym!”