Ýolsuz ýol

Men özümi ýitirýärin kämahal,
azaşýaryn ýolsuz ýolda, ýodada,
ýazylmadyk setirlerim gykuwlap,
çozan ýaly hiç adamsyz adadan,
ganymyna gylyç syryp duýdansyz,
basyp alýar goşgy beýnimi, başym,
galam gerek, kagyz gerek gyssagly,
ýa-da telefonym, söweş ýoldaşym,
duýgulary saklar ýaly azajyk,
alyp galar ýaly, ýitirmän doly,
men özümi ýitirýärin kämahal,
bu, megerem, her adamyň ykbaly.