Külnama

Sen agzyndan ot sowurýan aždarha
günde bir gyz, iki oglan ýuwudýan,
garşy çyksaň, gylyç däl-de, galamly,
serederler ses-üýnlerin çykarman,
garaşarlar ýuwdulmaly günüňe,
sagadyňa, sabyrlaryn tükedip,
aždarhanyň nökerleri goluňa
gandal salyp äkitseler, atsalar
demir gapyň arkasyna, guşlary
uçar, galar al-asmana, geçisi
daga ýaýrar, arak başy dostlaryň,
düýn-oňňunam pikiriňi paýlaşan,
alan ýaly alyp biljek postlaryň,
böregiň başynda eder gybatyň,
gowusy az, sanardan kän kümsügi,
aman galsaň, ýüzi solar ymmatyň,
adyň çyksa ýagşylykda, ýaman däl,
baglan ýaly ähli aýlawy atyň,
başlar birden ogurlygyň ulusy,
ýerli-ýerden, dost-duşmanyň birleşer,
hiç ikisi bir gürrüňe gelmedik,
öňki, soňky dil düwüşer, gürleşer,
garalajak adyň, gaçyrjak badyň,
kän görersiň gitdigiňçe uzaga,
nirelerde iliň gutaran ýeri,
uly gürlär kiçeldikçe, haýbatly,
Köpetdag däl, küldür oturan ýeri.