Saklajak zat

Sen hiç kimi, hiç närsäni ýanyňda,
bagra basyp, tutup saklap bilmersiň,
gider her kim öz ýoluna, päline
ýoldaş bolar adam ogly, eglenmez,
ýa garrarsyň, könelişer duýgular,
gözleriň küteler, küteler huşuň,
emma ýüregiňe ýürek goşanlar,
göwnüň üşüdende bolanlar howur,
ýakyn bolsun, ýa ýat, keseki bolsun,
it, guş bolsun, ýa-da bolsun bir agaç,
kakaň melleginde ösen, boý alan,
soň çapylan gurap kanal gelensoň,
saýa bolar bir gün galsaň yssyda,
gol-pudagyn gerip, ölmän gussada,
Köpetdagda teşneligiň gandyran,
soň gömülen çeşme uzak illerde
hakydaňa geler, nurlanar gözüň,
hiç ýamany alyp galma özüňde,
ýatda sakla diňe melhemin sözüň.