Ýaradanyň günäsi

Doganlaryň geldi, erkekleri däl,
aýal doganlaryň, akyl bermäge,
şaý-sepleriň sat diýdiler zat goýman,
öýüň düşeklerin, haly-palasyn,
mebelleriň, näme boljak agaçdan,
köýnekleriň, geçjek gyňajyň bolsa,
eşikleriň bolsa, eplengi duran,
ýaglyklaryň, gap-gaçlaryň ýüzlüje,
sat barjasyn geçen, alnan ýerinden,
çykar doganymyz, sowuk zyndanda
gujaklap ýatmasyn arzuw-hyýalyn,
tussag boşap, gelenden soň öýüne,
gürrüň berdi haýran galan aýaly.

Söz tapmak kyn, düşündirip bilmedim,
o tussag däl, para berip, pul berip,
şaý-sepleriň satyp, çykaryp bolýan,
dogany siz, siz bilmeýän bolsaňyz,
näçä durýar gara başy, bahasy,
il näbilsin, geň görerdim geplerin,
diýdim ol däl, belki, ýaradan asy.