Wagt ogurlygynyň jezasy

Sen bilmersiň, okamagy öwrenip,
wagt ogurlap deň-duşlaryň oýnundan,
aşyklaryň sanamagy unudyp,
parany, çeligi, futboly hatda
ýadyňdan çykaryp okan günleriň,
ýa-da uzak günüň ogurlap pagta,
aç galan itiňe döz gelip käte,
gaharyny zynjyryndan çykarýan,
okan kitaplaryň duşman boljagyn,
duşmany etjegin basyp alanyň,
seniň üçin ak mekdebi, kluby,
gadalyndan kitaphana salanyň;
sen bilmersiň wagt ogurlap eneňden,
ýa ataňdan, gözün diken ýollara,
goşgy ýazýan wagtyň duşman etjegiň
dost-ýarlaryň, kärdeşleriň özüňe,
döwletiňi, hökümetiň, hökümi
bitmän galjak seni okasa millet,
sen bilmersiň nämedigin ykbalyň,
ýa tutjagyň näçe garpyz bir elde.