Syýasatsyz syýasat

Syýasata kim gelmeýär,
zamanalar dürli-dürli,
kimler gelýär bilmän oňa,
kimler gelýär bile-göre,
sada çopan, çoluk bolsun,
daýhan bolsun ýer dyrmaýan,
syýasata gelýär bir gün,
gyşda buýup goýunlary,
geçileri otsuz, iýmsiz,
gurak gelip ýyllar ýa-da,
döwlet bolup gara ganym,
ilin goýan ýaman ada,
talap, garyp-gasar edip,
syýasata kim gelmeýär,
başda ondan daşa gidip,
gelmän asla golaýyna,
gowy adam, erbet adam,
käsi gelýär has giç, ýadap...

Syýasata kim gelmeýär,
yzyn gömjek jenaýatçy,
ogury-jümri, içigara,
çykjak iliň depesine,
basgylajak garry, juwan,
saman, sypal edip halkyn,
açygyny suwlap, suwap,
gygyrýar ol ýatmaň, galkyň,
sowukganly, hasap bilen,
çünki bilýär boljak asy
ýeňiji däl, ýeňlen, ölen.

Syýasata kim gelmeýär,
başyn goýjak gowulyga,
kitap berjek, depder berjek
çagasyna garyplaryň,
ýa ýumurjak mekdepleri,
pul edinip namys-aryn,
garakçylar, talaňçylar,
okuw gören ýa görse-de,
okamadyk ýeke kitap,
ýa okasa düşünmedik
ýazylana, aýdylana
setirleriň arkasyndan,
akly ýetmän, tutman huşy,
ýa ýat tutan Pyragyny,
başda akyl, bagt guşy,
gonan gelip kellesine,
soňra içip, çekip, pahyr,
özi eden bellisini...

Syýasata kim gelmeýär,
kimler gelýär aldamaga
kimler gelýär aldanmaga,
hantama kän süýji söze,
gedaýy kän güler ýüzüň,
kellesini işletmejek,
teresizi döwlen ýa-da
ýitirenler daşyn onuň,
ýa terezi berilmedik,
doga sada, ýa köp bilip,
iller gursun geçit diýýän,
iller gazsyn içit diýýän,
men geçerin ýeňil, aňsat,
men içerin dury suwy,
bulandyryp deňzi, belki,
balyk tutjak gelýär muňa,
tomaşaçy bolsaň gülýän,
gylçyk ýeter käte saňa.

Syýasata kim gelmeýär,
kim gelmejek bolsa açyk,
kim gitmejek daşa ondan,
bolýan bolsa, ýurtdan gaçyp,
bolýan bolsa, busup öýde,
ýa işinde, puly bolup,
kim galmajak özi bilen,
öz bagtynyň guly bolup,
ýa kowalap keýpi-sapa,
kim gelmeýär syýasata,
başyn urup demir gapa,
ýa-da durmuş syýastamy,
sallançakdan tabyda çen,
bu bir sorag, jogap belli,
hem belli däl, bilmeseň kän,
ýaşan bolsaň hülli-hülli,
galjak bolup ölmeseň kän,
kim gelmeýär syýasata,
ýa-da gelip, bilmän ony,
näme bolýar, kim ölmeýär?