Ýaşuly maslahaty

O ýaşuly saňa gowy bol diýýär,
çöküp ýaşa diýýär dyzyňa uzak,
toba edip arzuw, islegiň bolsa,
öldür diýýär höwesiňi, pikiriň,
elek bilen suw getirip her agşam,
düýbün ölle gurap barýan şüküriň,
ýogsa diýýär birden tükenip sabryň,
işi ýetik topar gazmasyn gabryň,
ikiýüzli, süwümsizden düzülen,
on-on bäş däl, köp kelleli aždarha,
birin çapsaň, gany daman ýerinden,
ýaýrap gidýär hünji ýaly üzülen,
nirä barsaň çykýar öňüňden hatar,
kem-kemden ulalyp, boý alyp, tutar,
atar ogly, atar gyzy boljaklar,
gowy ýaşa diýýär saňa-da olar,
ýagny dyza çöküp, başyň galdyrman,
agzyň ýumup ýaşa diýýär owadan,
o ýaşuly saňa görkezýär ýoda,
dagy nätsin ýol bolmasa obada?