Özleşdirilmedik sapak

Lenin öldi, babamyzdy mähriban,
partiýanyň daýanjydy, ikinji
Trotski bolmalydy atamyz,
akyl-paýhas çogup durdy sözünden,
emma ýalan eken, däl eken çyny,
Kamenew, Zinowýew, Buharin bildi,
zor eken Stalin, agdardy ony,
ýurtdan kowdy, emma salym geçmänkä
belli boldy Kamenew we Zinowýew,
Buharin üçüsem düzüw däl eken,
sag bolsun, ýetişdi Ýagoda aga,
a soň Ýežow geldi, görüp otursak,
Ýagodaň hem päli düzüw däl eken,
haýyn eken, dogmaz indi oň ýaly,
soň düşündik, gül bar, bolmaly tiken,
satlyk bolup çykdy Ýežow aga-da,
edil öňki atylanlar mysaly,
sag bolsun Beriýa, tanatdy ony,
ýöne birden haldan gaçdy Stalin,
jan berene kwartira bermeli,
Lenin bilen goňşy boldy duldegşir,
Žukow tutdy ýakasyndan Beriýaň,
paş bolansoň haýyndygy, soňundan
belli boldy - duşman eken Žukowam,
sag bolsun Nikita Hruşew aga,
açdy turup Staliniň ýüzüni,
giç däl eken ölensoňam bilinse,
diňe ol däl, egindeşi bir topar,
hiç bolmadyk ýaly, gitdiler dagap,
nätjek, galan ýaşamaly, gülmeli,
ýykylan ýerinden galjak bolmaly,
bolmaz ahyr iliň barysy dönük,
öňe çykan atylmaly, ölmeli,
Brežnewden umyt etdik bu sapar,
emma ýene, gowy gerek Alla-da,
aldy ony öz ýanyna gysganyp,
bilip galdyk soňkulardan onuňam
durgunlygy gowy görenin gaty,
Andropow aga, Cernenko aga,
münüp gitdi derrew agaçdan aty,
hudaý berdi Gorbaçýowy millete,
ýaş, gujurly, ýanyp durdy gözleri,
gözümizi açdy, açdy beýnimiz,
ak altyna gaplaýmaly sözleri,
umyt etdik, düzeder ol bu işi,
arassalar partiýany, Watanyn,
soňy näme, görüp ýörüs barymyz,
kimiň kimi nirde näçä satanyn.