Goýulmajak gürrüň

Sen KGB-äň türmesinde,
diwarlary çyrşak, hapa,
ölenleriň nalasyny,
agysyny eşitdiňmi,
eşitdiňmi sen olaryň
yzlarynda galanlaryň
seslerini, gözýaşlary
öz ýüzüňden syryganda,
gyş gijesi, gar ýaganda,
ýa tomusda, howa ýetmän
demigeňde öz demiňden,
çagalaryň gaýgy edip,
öldüňmi sen ölmezden öň,
agladyňmy diňip bilmän,
soň özüňe gülmezden öň,
ýa bu gürrüň seniň üçin
biderekmi, bigerekmi,
saňa diňe pul gerekmi,
hukuk, kanun diýen bolup,
biz bir başga, ýat adamlar,
ýaşasak-da bir ülkede,
bir toprakda, gawuny kän,
üzüminden doýup bolmaz,
men dirikäm, ýa ondan soň,
bu gürrüňi goýup bolmaz.