Ol janyna jan tapmaýar
Pasportyny täzelemek üçin Türkiýeden yzyna dolanýan zähmet migranty üçin gollanma
Ol janyna jan tapmaýar, ölmeli,
belki, muny her bir gören bilmeli,
gorkmaly däl haýbatyndan, alyndan,
ýurtdan giden ýurda gaýdyp gelmeli.
Seni sorag etse jellady hanyň,
elinde sagady, agramy, belki,
bahasyndan görünmeli alýany,
talaýany ilin näçinji bolup,
artyk gürrüň etme, ýöne bil gowy
hukugyňy, hukuklaryn jelladyň,
bildir oňa kanun näme, bilýäniň,
gorkma, ölüm bolan döwletden gorkup,
aman galyp bolmaz gorkanyň bilen,
gara sen gözüne ölümiň göni,
diý kanun bar, men kanuny bozmadym,
iş hakym bar, durmuş hakym bar meniň,
ogurlap däl, gidip işläp alýaryn,
iýjek çöregini çagamyň yzda,
diý hakym bar ýurtdan çykyp gitmäge,
soň yzyma dolanmaga, ýöne hiç
para berme, aç döwlete öwretme,
goý, ol ökde bolsun başgany talap,
sen eliňi hapalama, mertebäň,
ar-namysyň gora namyssyz handan,
ol özüne jaý tapmaýar jahanda,
sen özüňi saklajak bol, baş ogry,
öňki ýaly bir gün çykýança sandan.