Gadyr-gymmat gözlegi

Gadyr gözläp özüňe,
gymmat gözläp özüňe,
goldaw isläp azda-kän,
agyr günde, gaflatda,
ýalňyş ýere seretme,
gözleme sen ýok ýerden
ýagşy sözi, gümana,
ýok soraga ýykylyp,
salma özüň dar ýere,
galagopuň oýuna,
çukuruna gaçanyň,
duşmanyň däl, özüniň,
gözle gadyr-gymmatyň
daşardan däl, içerden,
öz-özüňden ozaly,
nirden bilsin bigäne,
ýatlar seniň gazalyň?

Ýalpak ýapdan geçende,
balagyny çyzgaman,
çykarýandan sorama
setirleriň çuňlugyn,
sen özüňden daşlaşma,
kowlaşma salgyma,
hakykatyň unudyp,
nogta salyp, mal ýaly,
itjek içi gümanly
kändir berseň bagyňy,
çekjek elden sypdyrman,
başgalaryň öýkesin,
kinesini igleden,
kitiwüni aňyrdan,
bahyllygyn bil gowy,
salma ony içiňe,
gepe, söze ynanyp,
goý özüne arzanyň,
arzysyny ideme,
getirse ber yzyna,
seniňki däl hiç haçan,
gora özüň, umydyň,
azaşdyrjak ýollardan,
özüň eliňden tutup,
çaga ýaly äkit sen,
agyr duýsaň özüňi,
hassa etse pes sözi,
galdyr başyň, daga çyk,
tokaýlary darakla,
deňizleri warakla,
kitap ýaly, başuçda
okamaga goýulan,
ynan diňe özüňe,
bolma gözi oýulan.