Säher dogasy

Güýç ber diýdik, medet soradyk günde,
goýma diýdik gara güýjüň öňünde,
töhmet bolan milletine, ýurduna,
türme bolan, ölüm, aýralyk salan,
musallatdan gora diýdik, ýaradan,
ýetiş bolsaň bu dünýede, onda däl,
sebäbi bilýäris, görýäris günä
1% bizde bolsa, galany
hökümetde, doýmaz-dolmaz, oýnatgy,
götermeli, gaba ýerin öpmeli,
aýdylşy dek il içinde, taktika,
ölüşine görä gömüp, depmeli
ýeňsesinden, “hä” berseň-de ýylgyryp,
emma bize berlen terbiýe başga,
tälim başga, başarmadyk ýalany,
sowet baýdagy dek göterip göge,
parlatmadyk ýykylsa-da SSSR,
ýüzümiz ot aldy sözlesek galat,
wyždanymyz ýatyrmady gijeler,
güýç ber diýdik, şondan soradyk medet,
ýa ýaradan, alla, bar bolsaň ýetiş,
ejiz goýma ezijiniň öňünde,
ýa ýaragsyz goýma ýaragly bilen,
ýaralylar bilen, arly, armanly,
akyl eçil, paýhas eçil, nur eçil,
ýalňyşdyrma, adam diýip ýylana,
çakmak üçin amatyna garaşýan,
goltugymdan ýer bermäýin, üşük ber,
hem uzatma beren zadyň uzakdan,
arşda bolsaň, özüň ýere düşüp ber?!