Ýesiriň ýesiri

Iller näme diýer diýip gypjynyp,
gaýgy edip ýer-ýesiriň diýjegin,
ýesirleriň arasynda baş egip,
ýaşan adam gowy bolmaz ýesirden,
tapsa tapsyn aladasyz iýjegin,
ýa geýjegin, toýdan toýa gatnasyn,
iller näme geýse, geýip egnine,
diýsin iller näme diýse, gaýtalap,
hiç özi däl, bolsun diňe göçürme,
gülen bolsun gülýänine olaryň,
tankytlasyn tankytlanyn düşünmän,
ýa düşünip, bahyllykdan, başagaý,
biri-birin saklan bilen saklanan,
ýoldan galan bolýan wagty bagtyýar,
ýola çykan ýoldan çykan çaklanar.