Ýazýan wagtyň

Ýazýan wagtyň öz taryhyň,
urulanyň, gyrylanyň,
bir-biregi goran wagtyň,
gysan wagtyň, busan wagtyň,
goramaga derek merdi,
aýagyny köwüp uzak,
ýa köwýäne getirip pil,
ýykan wagtyň hakda özüň,
açyk, aýdyň ýazmaly sen,
biler ýaly ýalňyşlaryň,
alar ýaly sapak ondan,
ýaýaplaman jinnek ýaly,
basyp alan zalyma-da,
top-tüpeňi ýetik heniz,
öljek ýöne, dişläp galjak,
kim biler kim näme boljak,
goý, galamyň öz eliňde,
öz ýüregiň bolsun, oglan,
berme ony başgalara,
gülüm-ýalym, haýbat atsyn,
hiç tutmasyn eliň kimse,
galamlysyn, boşuny däl,
ýazýan wagtyň öz taryhyň,
sen hiç kimiň goşuny däl,
ýesiri däl, bolsaň ýitdiň,
ýazyp galman hakydada,
ýalan bilen galdyň, gitdiň.