Akylly adamlar

O milletiň adamlary akylly,
tanar, biler dogry sözli ynsany,
gaçar ondan mümkin bolsa uzaga,
belet olar ýalançynyň oýnuna,
ýöne bary düşer baryp duzaga,
gulagyndan nogta salnan mysaly,
meger, bary örän öňden görüji,
bilýär barha beter boljak ahwaly,
ýaşlary bar, dil öwrenýär, samsyk däl,
gojalary, susup bükülen bili,
akyl berýär agtygyna, başarsaň,
çyk, git diýýär, gora diýmeýär ili.