Namart

Namart seniň gören görgiň az görer,
aýralygyň, ýat illerde entäniň,
hatda ölseň, öleniňi az görer,
ýene, ýene, ýene ölmegiň islär,
zyndanlarda çüýremegiň islär ol,
sürgünlerde süýrelmegiň islär ol,
arzuw eder adyň, soruň ýitmegin,
bagyşlamaz diri galsaň, gutulsaň,
gelip bilmez öňki kärdeş, dost bolup,
gözaýdyňa ýaramaz ol, sowular,
ýolda duşsa, hatda gelse pete-pet,
ynanma sen duşman diňe duşman däl,
emel ýeten, türmäň açary ýeten,
seniň bilen arak içen adamlar,
goşgy okap, kyssa okap bileje,
seniň bilen göwni göçen adamlar,
haldan gaçar adyň bilinse, galsaň,
iş başynda, galamyňy taşlaman,
kümsük seniň gören görgiň az görer,
başarmaz ol är bolmagy, kaşlaman.