Soralmadyk maslahat

Gara güýje guwanma, han,
bolarsyň san, sansyz, bisan,
guwanma hiç töhmetiňe,
terroryňa guwanma sen,
adalatsyz adalata,
kazylara, garalawçy,
aklawçyňa guwanma sen,
ýürek iýen çörek ýerne,
arak ýerne içen gözýaş,
milletiň aç, gawun, terne
ekip bilmez ýap boýunda,
gyrasynda ekininiň,
ýazda agy hyllalla oň,
güýzde gögi gara gaýgy,
çörek atly, il pyýada,
saňa gerek öwgi, aýdym,
guwanma hiç haýatyna,
içden urýan türmeleriň
guwanma hiç tussagyňa,
sany näçä ýetsin, gorkup
günde ölýän, bir gezek däl,
guwanma sen ýitirenňe,
adamlary diri, öli,
galanlary gider çykyp,
ajyň aňy bolmaz, ýurduň
batar, galar beýnisiz, boş,
el çarpýanlar iýer başyň,
bolan bolup bagtyýar, hoş.