Ýalançynyň güýji

Sen ýüzüňe ýalan sözlän adamdan,
ýalanyndan utanmaýan hiç haçan,
açyk görünse-de aňyrsy, bärsi,
galplyk bilen menzil alýan aç-açan,
ýadaýarsyň ýylgyrsaň-da sypaýy,
bile-göre ýokmajagyn çyn sözüň,
a ol dowam edýär almagyn paýyn,
egni bilen kakyp geçip deňiňden,
düwülse-de ýumruklaryň daş ýaly,
hyýalyňda ýeňilýärsiň uruşman,
çekilýärsiň üstüň-başyň kakynyp,
ýykylan dek göýä kirşenli ýolda,
hemem kileň özüň ýaly uýaljaň,
dilin ýuwdan ilden gözleýäň dalda,
a ol dowam edýär ýoluny batly,
sen ýüzüňe ýalan sözlän adamdan,
gutulyp bilmersiň gaçsaň-da atly.