Gürrüň howpy

Özüň hakda gürrüň berme, kim bolsun,
geçen ýoluň başyn gören, görmedik,
ýa ýol näme, ýoda näme, bilmeýän,
ýa ýodany goýýan ýoldan ýokarda,
öz ýanyndan özün ýeriň göbegi
saýan bolup ýören seniň gürrüňiň
“G” harpyna düşünermi, düşünmez,
ýa-da güriplikden, içi garalyp,
awusyny pürker ýylgyran bolup,
taşlan bolup öz deňinden aşaga,
ökünersiň öz deňiňe göterip,
içiň dökseň, görmejege hiç haçan,
özüň hakda gürrüň berme hiç kime,
şaýy borsuň ownuk, hümmeti gaçan.