Gaz gulçulygy

Seniň işiň aman galmak, gutulmak,
ýa saklanmak biraz uzak, gaý, tupan
sowulýança, köşeşýänçä tebigat,
ýöne yssy, sowuk, açlyk, bela kän,
iň beteri bolup biler doklugyň,
düýnki gören görgüleriň unudyp,
ýa-da şonda diýip kim bardy, geldi,
gol uzatdy aç çagama, özüme,
ýöne özgäň ejizligi özüňde
özüňi öldürse, nedip aýnada
seretjek sen öz ýüzüňe, gözüňde
bolanda-da iň garasy äýnegiň,
seniň işiň diňe aman galmak däl,
halas etmek, el uzatmak bolmanda,
pul kömegin başarmasaň, etmeseň,
dil kömegin bermek yzdan gelýäne,
ýa ýatana, irkilene ýorulyp,
ýa oýnaýan gaflat oýnun gorkudan,
süýji uka batan bolýan aç garna,
düýşünde dograma, palaw başynda,
baş galdyrsa, başlyklary aşyndan,
çorbasynyň çorbasyndan keserler,
ýurdun goran gyrkylykly, gylyçly,
top, tüpeňli gelen duşmana garşy
durup, durman ýere siňen milleti,
hemem galan interneti petikli,
her näme et, unutmarsyň, gitmersiň,
ýöne oňa iki bolup, üç bolup,
on bäş bolup, goltgy berip bilmersiň,
ýüz bolmaly, müň bolmaly azyndan,
depmeli däl iş edýäniň ýüzüne,
halas etjek bolsaň ili gazyndan.