Uruş hakykaty

Uruş açdy, alla, gözümiz birden,
açyk diýip, ýapyk eken beýnimiz,
dost-doganlyk gürrüňleri, erteki
beýikligi hakda uly doganyň,
basyp alan, gyran, uşadan soňsuz,
gorkuzyp syladan, gorkuzyp sylan,
adam saýan bolan özgäni, özün,
açdy uzak, açyk gizlän syryny,
ýok edip, täzeden ýazyp taryhy,
beýik barlygyny, dakylan boýna,
ynsanlygyn inkär etdi, ýaragly,
haýbat atyp dünýä, güýçli bolup däl,
gorkusyndan, müýnli bolup, belki-de,
kinolary üçin, aýdymy, sazy,
kitaplary üçin, uruş hakynda
birtaraply gürrüň beren mydama,
bizi oýnan, özün oýnan adamlar,
indi öz-özünden gaçýar ýadaman,
ýaltanman dünýäniň aňry başyna,
beýikdiler, eýesi dek älemiň,
indi mätäç ýat illeriň aşyna.