Ýalan abraý

Il içinde adyň ulalan bolsa,
şan-şöhradyň artyk bolsa çeniňden,
götermese injikleriň agramyn,
indi, şükür, kameraçy gerek däl,
telefonyň bilen bitirýäň işiň,
wideo ýaz, birlerine jabjynyp,
döw üstüne nagaraňy çem gelen
günäliniň, bigünäniň, ýuwaşyň,
şyltak atmak geler bolman diliňden,
gygyr, arla, ak köpük saç agzyňdan,
delilim bar, taryhy diý, ýazylan
daşlaryna Ýeniseýiň, Orhanyň,
belki, gorkuzarsyň, müýni barlary,
iň bolmanda biraz düşüşer ganyň,
zyýany ýok tanadanyň, abraý
hemişelik berilmeýär hiç kime,
alkyş oka hudaý beren YouTube,
göterip dur gerdeninde bar ýüki,
çemçe bilen ýygnanyňy barybir,
bir gün çanak bilen gitmeli döküp.