Bu ýol

Bu bir ýoldur, gaty, ýuwaş görse-de,
hemmeler düzgüni berjaý etmeli,
öz ýoluňa garap, ýagdaýa görä,
gaza basyp, batly öňe gitmeli,
gazyňy gowşadyp, geçirip deňden,
gyssanýanlar bolsa, ýa bolsa haýal,
garaşmaly, sabyrly gul bolmaly,
saga, sola seretmeli hemişe,
gözden salman hatda yzdan gelýäni,
iki göz däl, dört göz bolup ýetmeli
menziliňe, dolanmaly yzyňa,
durmuş şeýle, adam ýolda ötmeli...

Bu bir ýoldur, emma düzgün hemişe
deň bolmaýar hemme üçin gyradeň,
ony tanky, topy bolan äsgermän,
bozýar käte "başga alaç bolmasa”,
käsi asla düşündiriş bermeýär,
kim sorajak agzyn açyp azgyndan,
kime gerek dişlerini döwdürmek,
ýa zyndanda uzak ýyllar ökünme,
alla uzak, bilýär muny adamlar,
bu bir ýoldur, öňe seret, sökülme.