Olar seni diňlemezler

Olar seni diňlemezler,
diňlemezler özlerin-de,
eşitmezler ahy-nala,
ene çeksin, çeksin ata,
aç çyrlasyn çagalary,
çünki geçmiş tutar, saklar,
saklar güýçli agalary,
zynjyr bilen beýnä salnan,
ýüreklere salnan arkan
çeker yza, müň bahana
bardyr gözün açmajaga,
görmejege görmelini,
olar çyny islemezler,
islemezler hakykaty,
öldürilen ozal diri,
ýene ölmek üçin ýatyp.