Düzgünsiz oýun

Sen ýokarda akyllynyň rolun
oýnaýarsyň günde köýnek çalşyryp,
il aşakda akylsyzyň rolun
oýnan bolýar günde başyn çaşyryp,
ikiňizem bilýärsiňiz bu oýun
öňden gelýär, basyp alan öwretdi,
ýalan şahyr ýazýar ýalan goşgusyn,
ýalan bagşy aýdýar ýalan aýdymy,
ýalan gülki galýar asmana, göge,
bäri-bärde durman, ýetýär hudaýa,
ýylgyrýar ol ýalanjykdan, elbetde,
il-ulusyň raýyny ýykmaýar,
şeýlelikde, sen ýokarda akylly,
il aşakda oýnap-oýnap ýykyldy.